Gan fod gen i funud fach yn sbâr, meddyliais waeth i mi sgwennu blog a rhoi’r diweddaraf i chi.

Hwn yw semester mwya’r flwyddyn academaidd o bell ffordd, gyda digwyddiadau fel ail ffair y glas, Varsity, Campau’r Cewri, Swper y Cymdeithasau a lluniau’r Cymdeithasau a’r Clybiau i gyd yn dod syth ar ôl ei gilydd; mae’n gyfnod prysur tu hwnt. Rydym hefyd wedi llunio drafft cyntaf y ‘Cynllun Strategol Gweithgareddau’ lle’r ydym yn llythrennol yn cynllunio dyfodol Gweithgareddau yn Aberystwyth; cewch fwy o fanylion isod.

Ail Ffair y Glas

Diolch yn fawr iawn i Kate Heaven a Dan Meehan am weithio mor galed ar gyfer Ail Ffair y Glas! Fel grŵp, sylweddolon ni nad oedd ffurf ffeiriau’r gorffennol yn gweithio. Nid oedd llawer o bobl yn mynd iddynt ac roedd myfyrwyr yn gwastraffu eu hamser wrth eistedd mewn ystafell wag am y diwrnod cyfan pan fo ganddynt waith i’w wneud. Y ffordd ymlaen oedd gwahodd busnesau i’r ffair a oedd yn cynnig cynigion ardderchog i fyfyrwyr. Fe drefnwyd sioe ffasiwn yn ogystal ac roedd yn boblogaidd iawn. Gobeithiwn barhau â’r ffurf hon y flwyddyn nesaf gan ei datblygu ymhellach, gan alluogi clybiau a chymdeithasau gael y gorau o’r cyfle hwn i ddenu aelodau newydd!

Varsity 2012

Roeddwn yn ofnadwy o siomedig na ddaethom ni â thlws Varsity adre eleni. Ond rhai mi ddweud fod ymdrechion ein clybiau yn anhygoel gyda llawer o gemau agos iawn. Aeth gemau pêl-droed y dynion a’r merched i giciau o’r smotyn, enillwyd y gêm bêl-rwyd gyda basged yn yr eiliad olaf a nawn ni ddim sôn am y problemau gyda’r caeau rygbi. Hoffaf hefyd ganmol ein Carfan Tennis Bwrdd a gurodd eu cyfoedion ym Mangor yn eu gêm gystadleuol gyntaf erioed. Roeddwn yn falch ofnadwy o ymdrechion ac ymddygiad pawb ym Mangor – roedd yn ddiwrnod rhagorol i’r 400 o fyfyrwyr a aeth ar y bysiau i’r Gogledd! Y flwyddyn nesaf, byddan nhw’n dod i’n herio ni ar ein tomen ein hunain a gallaf eich sicrhau y bydd y tlws yn dychwelyd i’w iawn le yn Adeilad Urdd Aberystwyth!

Campau’r Cewri 2012

Roedd Campau’r Cewri 2012 yn llwyddiant enfawr gyda 42 o dimau’n cystadlu, a threfn a digwyddiadau newydd sbon. Heb os, fe wthiwyd y cystadleuwyr i’r lefel nesaf o ran ffitrwydd corfforol, ac o ran yr hwyl a’r miri. Rhwng y prawf blip ar bnawn dydd Gwener, a’r gamp ddirgel ym Mlaendolau ar y dydd Sul; gobeithiaf fod pawb wedi mwynhau’r ddau benwythnos. Llongyfarchiadau enfawr i bawb a gymerodd rhan yn yr achlysur gan helpu i’w wneud yr un mor llwyddiannus ag arfer, a hoffaf ddiolch hefyd i bawb a gynorthwyodd.

Enillwyr Campau’r Merched oedd  – FC Dirty Tackle

Enillwyr Campau’r Dynion oedd  – The King Cobras

Lluniau’r Cymdeithasau a’r Clybiau

Daeth cwmni Take That Photo draw i dynnu lluniau’r clybiau a’r cymdeithasau hynny a gofrestrodd ar gyfer y lluniau, gyda’n grŵp ni’n tynnu lluniau’n gyson am ddau ddiwrnod, credaf fod pawb wedi cael lluniau arbennig iawn i gofio’u blwyddyn gyda’u clwb neu eu cymdeithas, ac roedd y cwmni’n canmol ein myfyrwyr yn fawr iawn. Byddan nhw hefyd yn rhoi’r holl luniau ar eu gwefan yn fuan iawn.

Swper y Cymdeithasau

Cynhelir y swper nos Wener yma (23/3/12) ac rydym yn gobeithio am gynnydd ar y llynedd, rydym wedi cael nifer fawr o enwebiadau, bob un â rhesymau gwych y tu cefn iddynt. Pwrpas y noson yw cydnabod y rheini sy’n gweithio mor galed dros eu cymdeithas. Rwy’n siwr y bydd hi’n noson wych yn y Pier Brassiere nos Wener. Byddaf yn eich diweddaru am y noson ar ôl nos Wener.

Gwella Prosesau

Rwyf hefyd wedi dechrau gwella prosesau’r Urdd ar gyfer clybiau a chymdeithasau. Ar hyn o bryd, mae llawer ohonynt yn hirwyntog ac weithiau’n rhwystro yn hytrach na helpu. Bydd yna gopi diwygiedig o’r drefn ddisgyblu ar gyfer aelodau o glybiau/cymdeithasau neu aelodau o bwyllgorau, dull newydd a haws o sefydlu cymdeithas/clwb  ac adnewyddu rhai agweddau ar gyfansoddiadau cymdeithasau/clybiau. Bydd y rhain i gyd yn mynd trwy’r CC ac ar gael i chi eu darllen wrth gwrs – felly gall gymryd amser gyda phethau eraill yn digwydd, ond, o leiaf mae’r broses wedi dechrau.

Cynllun Strategol Gweithgareddau

Mae rhan gyntaf y Cynllun Strategol Gweithgareddau wedi’i drafftio, nawr mae angen gweithio arno i flaenoriaethu a gweithio ar sut y dylid gweithredu’r datblygiadau hyn mewn ffordd sydd orau i fyfyrwyr Aberystwyth. Mae’n gyffrous meddwl beth allai ddigwydd gyda chymorth gan y Brifysgol a beth allai chwaraeon, cymdeithasau a gwirfoddoli fod yn y dyfodol.

Lleoliadau Fideo

Rwyf wedi bod mewn cysylltiad ag Adran Theatr, Ffilm a Theledu, a bydd yr Urdd yn darparu lleoliadau i fyfyrwyr yn yr 2il flwyddyn ddod yma a chreu fideos. Bydd yn mynd allan i fyfyrwyr yr adran yn fuan er mwyn iddynt ymgeisio; bydd yn gyfle i ychwanegu rhywbeth at eu CV ac at eu portffolio. Maent bellach wedi’u recriwtio a byddan nhw’n dechrau gwneud fideos newydd yn y dyfodol agos.

Ystadegau ar Chwaraeon a Chymdeithasau, a Phapur Pwysigrwydd

Byddaf yn casglu ystadegau yn fuan ynglŷn â chlybiau a chymdeithasau er mwyn ategu papur a fydd yn cyflwyno pa mor bwysig yw’r clybiau a’r cymdeithasau i brofiad y myfyrwyr yn Aberystwyth. Fe fydd yna hefyd ddogfen ar wefan yr Urdd yn amlinellu dulliau ariannu chwaraeon a chymdeithasau.

Pethau i Ddod

Ymysg y digwyddiadau sydd ar y gweill mae Swper yr Undeb Athletau a Rygbi 7 bob ochr, felly, mae yna ddigon i’m cadw’n brysur. A gobeithio yn y dyfodol agos, gallaf sicrhau storfeydd ar gyfer yr haf, os nad yn barhaol, i glybiau a chymdeithasau.

Fy mlog cyntaf ers tro byd!!

Rwy’n gwybod nad ydw’i wedi sgwennu blog ers amser maith ac mae’n ddrwg gen i am hynny. Rwy’n credu mai’r tro dwethaf oedd Awst 2010!

Felly mae yna gryn dipyn i’w drafod megis blwyddyn diwethaf i gyd a dechrau eleni, ond rwyf am ganolbwyntio ar helyntion diweddaraf y byd gweithgareddau a byd yr Urdd yn gyffredinol.

Yn gyntaf, hoffaf ddiolch yn ofnadwy i bawb wnaeth fy ail-ethol, a gobeithio bod gennych ffydd ynof i gyflawni fy nyletswyddau. Mae gweithio fel sab am yr ail flwyddyn wedi bod o gymorth mawr, gan fy mod yn gwybod be’ dwi’n neud bellach gan newid a dadansoddi meysydd sydd angen eu gwella a newid pethau yn yr hirdymor er lles y myfyrwyr. Yn gyntaf, rwyf am amlygu rhywbeth a ailgyflwynodd Jon Antionazzi a minnau'r llynedd sef y Courier. Mae’r papur newydd i fyfyrwyr yn mynd o nerth i nerth diolch i waith caled y pwyllgor newydd, ac mae’n siŵr o wella a datblygu gyda phob rhifyn. Rwyf mor falch o weld cyfryngau’r myfyrwyr yn tyfu gan wneud datganiad clir ar draws y campws. Os oes gennych ddiddordeb yn hyn, dewch draw, mae’n ffordd wych o dreulio’ch amser sbâr.

Efallai un o’r materion mwyaf enbyd rwy’n mynd i’r afael ag ef ar hyn o bryd yw grant y cymdeithasau, ar y funud nid yw’r gronfa’n ddigon mawr, ac o ganlyniad rydym wedi llwyddo ei ddyblu eleni o £2000 i £4000. Ond dyw hyn dal ddim yn ddigon yn fy marn i a byddaf yn cyflwyno cais i’r Brifysgol yn fuan iawn yn gofyn i gymorth i glybiau a chymdeithasau gynyddu’n ddramatig. Mae’r £4000 wedi’i ddosbarthu bellach i’r cymdeithasau hynny a ymgeisiodd am arian, a bydd yn mynd at brosiectau penigamp.

Rydym hefyd yn y broses ynghyd â’r Brifysgol o ddod o hyd i storfa ar gyfer clybiau a chymdeithasau fel nad yw’r holl gyfarpar yn cael ei gadw yn nhai’r myfyrwyr gan orlenwi ystafelloedd gwely. Unwaith rydym wedi dewis rhywle byddwn ni’n ei glirio er mwyn gwneud lle i’ch pethau ac yna byddwn yn sicrhau bod y storfa yn ddiogel.

Ar ben hyn, eleni rydym wedi newid strwythur yr Undeb Athletaidd a hoffaf ddiolch i bawb sydd wedi ein helpu ac am fod yn amyneddgar yn y broses. Mae’r broses o wneud cais am grant wedi newid gan wella pethau ymhellach i’r clybiau a hybu mwy o ddatblygu. Mae arian y grant wedi’i ddosbarthu ac rydym yn edrych ymlaen at weld ffrwyth yr arian hwn.

Hefyd eleni rydym wedi cael cyllid alumni ar gyfer llifoleuadau symudol a fydd yn declyn amhrisiadwy i’r holl glybiau gan gynorthwyo gyda hyfforddi yn y gaeaf. Rydym yn aros i’r arian gael ei godi a gobeithiwn eu prynu yn y flwyddyn newydd. O fewn yr adran gweithgareddau rydym hefyd yn ceisio creu cynllun strategol i’r clybiau chwaraeon a’r cymdeithasau ei gyflwyno i’r Brifysgol, er mwyn amlygu eu pwysigrwydd i brofiad y myfyrwyr! Byddwn ni’n gofyn am adborth gennych ar hyn trwy arolygon y byddwn yn eu gyrru atoch maes o law er mwyn sicrhau eich bod chi’n rhan o’r broses.

Mae yna lwyth o bethau eraill ar y gweill, heb sôn am holl ddigwyddiadau’r ail semester megis Varsity, Superteams a chwis y cymdeithasau. Os oes gennych unrhyw syniadau neu bryderon dewch draw i’m gweld a gwnaf fy ngorau i’ch helpu.

Roedd hi’n wych gweld cynifer o bobl yn y cyfarfod cyffredinol cyntaf, a braf oedd gweld gwleidyddiaeth yn dod i’r amlwg yn yr undeb. Cofiwch hefyd ddod i’r cyfarfod nesaf pan fydd yna bolisïau go sylweddol yn cael eu trafod.

Diolch i bawb a lenwodd Arolwg yr Urdd, rydym yn gwerthfawrogi’ch amser yn fawr, a byddwn ni’n mynd ati nawr i weithredu ar eich barn a’ch syniadau er mwyn gwella’r Urdd erbyn diwedd y flwyddyn academaidd hon. Diolch eto!

Daliwch ati i ddod draw i’m gweld, rwy’n addo eich helpu gydag unrhyw beth (o fewn rheswm) hyd eithaf fy ngallu, ac rwy’n addo’ch gwneud chi’n fwy ymwybodol o lwyddiannau byd chwaraeon a chymdeithasau.

Rwy’n addo hefyd ysgrifennu blogiau’n amlach gan fy mod wedi eitha’ mwynhau ysgrifennu hwn er nad wyf yn un am y cyfryngau cymdeithasol ‘ma!

Diolch

Min

O.N. Gweler dadansoddiad o grantiau’r cymdeithasau a'r clybiau yn yr atodiadau isod!!

Attachments:

Breakdown of Grants to Sports Clubs	[ ]	152 Kb
Breakdown of Grants to Societies	[ ]	61 Kb