S’mai eto,

 

Efallai y cofiai rai ohonoch y cyhoeddodd Leighton Andrews, y Gweinidog dros Addysg a Sgiliau, adroddiad yn gynharach eleni yn amlinellu sut roedd arno ef eisiau i’r Sector Addysg Uwch yng Nghymru newid ac o hyn daeth ‘Dymuniad Leighton am Gyfuniad’.

 

Yn y papur hwn (adroddiad gwreiddiol: http://wales.gov.uk/docs/dcells/consultation/110711futureofunihefcwen.pdf) dywedwyd y bydd Aberystwyth a Bangor yn parhau i gryfhau eu cysylltiad strategol gyda golwg ar ffurfio un sefydliad mawr gan greu’r syniad o gael Bangorystwyth.

 

Wrth gwrs does ond angen edrych ar fap o Gymru i weld bod tirwedd y wlad yn gwneud hwn yn syniad rhyfedd iawn, mae mynyddoedd Eryri yn y ffordd yn un peth! Ond o ddifri’, roedden ni a’r sefydliad yn credu’n gryf y byddai cyfuno yn cael effaith niweidiol ar brofiad myfyrwyr y dyfodol. Hefyd, dywedon fod gan Brifysgol Aberystwyth arwyddocad hanesyddol a diwylliannol i’r dref ei hun ac y byddai cyfuno megis tynnu calon allan o rywbeth sy’n ganolog i Aberystwyth fel tref.

 

At hynny, ymunon ni â’r Brifysgol er mwyn ymateb, dyma ddywedon ni fel Urdd:

"Ymateb i’r papur Future Structure of Universities in Wales

Annwyl Leighton Andrews AC

Rydym ni fel Urdd yn cefnogi ein sefydliad wrth amddiffyn annibyniaeth Prifysgol Aberystwyth.

Mae’r tir sydd rhwng PA a Phrifysgol Bangor yn profi ynddo’i hun y bydd costau a negyddion cyfuno yn llwyr drechu unrhyw ganlyniadau cadarnhaol a geir o gyfuno.

Ymhellach, mae ein Hurdd ni ac Undeb Myfyrwyr Bangor yn cyflawni rôl allweddol wrth amddiffyn a gwella’r profiad a gynigir i fyfyrwyr. Ym myd newydd Addysg Uwch, lle mae profiad y myfyrwyr o’r pwys mwyaf, gofynnwn i chi sut fydd cynnig i gyfuno o fudd i Urdd y Myfyrwyr Prifysgol Aberystwyth ac i’n rôl ni o gefnogi a chynrychioli myfyrwyr?

Mae’r diffyg mewnbwn gan fyfyrwyr yn yr ymgynghoriad hwn yn amlwg wrth ystyried ei amseriad; yn ystod gwyliau’r haf pan fo’r myfyrwyr gan fwyaf i ffwrdd o’r Brifysgol a heb gysylltiad â’r Urdd na’r sefydliad. Mae hyn wedi’i gwneud yn amhosib pwyso a mesur barn y myfyrwyr ar y mater hwn a thrafod sut mae ein haelodau yn credu y bydd cyfuno’n effeithio ar Aberystwyth.

Rydym yn erfyn arnoch i ailystyried unrhyw gynlluniau i gyfuno Aberystwyth a Bangor.

Byddwn ni’n sefyll yn gadarn wrth amddiffyn Aberystwyth fel prifysgol annibynnol ac ardderchog.

Yn gywir

Ben Meakin, Llywydd
Urdd y Myfyrwyr Aberystwyth"

Ben Meakin