|
S’mai bawb, mae hi’n brysur iawn yn yr Urdd ar hyn o bryd, yn enwedig gyda’r etholiadau ar y gorwel! Dyma grynodeb o’r pethau rwyf wedi bod yn gweithio arnynt dros yr wythnosau diwethaf, rhag ofn ichi fethu rhai ohonynt.
Siop Goffi
Yn gyntaf, y diweddaraf am y siop goffi/Starbucks. Roeddwn wedi gobeithio y byddai’r gwaith adeiladu wedi hen ddechrau erbyn hyn, ond wedyn atgoffwyd fi fod unrhyw beth yn ymwneud â’r adran ystadau/adnewyddu’r Urdd yn cymryd hydoedd. Rwyf wedi anfon llwyth o ebyst i’r Brifysgol ac wedi bod yn annog staff yr Urdd i roi pethau ar ben ffordd, ac erbyn hyn mae’r cwch wedi’i wthio i’r dŵr. Yn anffodus, mae’n rhaid i ni nawr fynd trwy broses tendro gydag o leiaf tri chwmni adeiladu, a fydd yn cymryd 3 wythnos, ond yn y cyfamser, byddwn yn gofyn ichi pa fath o gaffi’r hoffech ei gael, hynny yw, rhywbeth tebyg i ystafell fyw draddodiadol gyda soffas retro, neu siop goffi fodern.
Proses arall sy’n ein dal ni’n ôl ac sy’n hollol chwerthinllyd yw’r angen am brawf asbestos. Rwyf, wrth gwrs, yn awyddus i beidio â gwenwyno myfyrwyr, ond rwy’n weddol siwr y cynhaliwyd y prawf pan benderfynodd y Brifysgol i osod simnai newydd trwy’r union fan lle bydd y siop goffi. Does bosib nad oes asbestos wedi ymddangos mewn 6 mis!
Cynllun Barnu eich Landlord/Llety
Fe wyddom ni gyd fod llety’r sector preifat yn Aberystwyth yn warth llwyr, dylai’r Brifysgol neu’r Urdd fod wedi rhoi llawer mwy o bwysau ar y sector preifat cyn hyn a dweud y lleiaf. Gyda hynny mewn golwg, rwyf wedi bod yn edrych ar yr opsiynau amrywiol am system ‘Barnu eich Landlord’ arlein. Gan fod y rhan fwyaf ohonoch yn defnyddio Facebook i wneud hyn yn barod, waeth i ni roi mwy o strwythur i’r peth.
Rydym wedi dechrau trafodaethau gyda chwmni o Gaint sy’n cynnal y wefan www.studenttennant.com, mae’n galluogi myfyrwyr i farcio eu llety, ac os bydd landlordiaid yn ymuno â’r wefan, bydd hefyd yn dangos calendr sy’n dweud pryd y bydd rhestrau tai’n cael eu cyhoeddi (a fydd gobeithio yn helpu i atal y rhuthrau a welwyd y tu allan i Alexanders yn ddiweddar).
Yn anffodus, mae’r Brifysgol ychydig yn bryderus ynghylch ariannu gwefan o’r fath. Maent wedi dweud na fydd yn gwneud gwahaniaeth gan y byddai’n rhaid i fyfyrwyr fyw mewn llety o safon isel beth bynnag.
Fy nadl i yw y byddai’n rhaid i fyfyrwyr fyw mewn llety gwael ond o leiaf y byddai mwy o wybodaeth ar gael iddynt. Mae’r Brifysgol hefyd yn dweud wrthym y bydd y llety newydd yn Fferm Penglais yn rhyddhau lle yn y sector preifat pan fydd yn agor yn 2014/15. Os felly, byddai’n gwneud synnwyr i roi pwysau ar y sector nawr mewn pryd i agoriad y neuadd newydd, a gobeithio erbyn hynny y byddai’r system marcio a grymodd y farchnad wedi gorfodi landlordiaid gwael i wella eu llety neu fod ar eu colled.
Os credwch y dylid gweithredu’r system hon yn Aber, rhowch wybod i mi neu’r Swyddfa Llety!
Hyrwyddo Gwaith yr Urdd
Mae’n siwr fod llawer ohonoch wedi sylwi fod pum llun (gweddol fawr) o’r 5 Swyddog Sabothol wedi ymddangos ger mynedfa’r Urdd. Mae hyn yn rhan o gynllun cyfredol i roi gwybod i fyfyrwyr ein bod ni’n gwneud llawer mwy fel Urdd na chynnal digwyddiadau fel Reload yn unig. Gobeithio y gallwn barhau â’r cynllun hwn a gwneud y gynrychiolaeth, y cymorth a’r gwasanaethau rydym yn eu cynnig yn fwy gweledol. Byddwn hefyd yn gosod blychau newydd ar gyfer posteri ar flaen adeilad yr Urdd, y cyntaf o’r rhain fydd canlyniadau Arolwg yr Urdd.
Ymgyrch Ysbyty Bronglais
Bues i i’r cyfarfod cyhoeddus diweddar y cynhaliwyd gan grwpiau lleol sy’n ymgyrchu yn erbyn y newidiadau difrifol i’r gwasanaethau sydd ar gael yn Ysbyty Bronglais. Yn ystod y trafodaethau, dywedais y bydd yr Urdd yn cefnogi’r ymgyrch gan y byddai’r toriadau’n effeithio’n ddifrifol ar fyfyrwyr gan nad oes gan lawer ohonynt geir ac maent filltiroedd i ffwrdd o ffrindiau a theulu a fyddai’n eu helpu fel arfer.
Rwy’n erfyn ar bawb i arwyddo’r ddeiseb arlein ac ymuno â’r ymgyrch:
http://www.facebook.com/pages/Save-Bronglais-Hospital/123628054426386
Mae llawer ohonoch yn chwarae chwaraeon cyswllt ac yn aml, ceir anafiadau sy’n gofyn am driniaeth brys. Mae pawb yn gwybod am rywun sydd wedi treulio amser ym Mronglais, pe bai’r Bwrdd Iechyd yn cael ei ffordd, efallai y bydd yn rhaid i fyfyrwyr fynd i Gaerfyrddin!
Cynllun Profiad Aber
Ac yn olaf, yn ystod y ddeufis diwethaf, rwyf wedi bod yn gweithio gyda’r tîm i gynhyrchu dogfen a fydd yn amlinellu dyfodol Urdd y Myfyrwyr Aberystwyth. Mae’n amlinellu beth yw profiad myfyrwyr Aberystwyth a sut y gall yr Urdd fod yn rhan hanfodol o hyn. Mae’n gofyn y cwestiwn allweddol; “Pe na bai’r traeth a’r bryniau’n bodoli yn Aber, a fyddai’r Brifysgol yn dal i gael marciau bodlonrwydd myfyrwyr mor uchel, neu a ydym yn lwcus o’n lleoliad?”. Hoffaf weld yr Urdd yn helpu i ddarparu profiad myfyrwyr yn Aber a fyddai gystal pe bai’r traeth yma ai peidio.
Byddwn yn cyflwyno’r ddogfen hon i’r Brifysgol gan obeithio y byddant yn ein cefnogi ag arian ac adnoddau er mwyn cyflawni’r amcan hwn. Yn fuan wedyn, bydd y ddogfen ar gael i bawb er mwyn i chi roi gwybod i ni beth rydych yn ei hoffi a beth nad ydych yn ei hoffi.
Os oes gennych unrhyw gwestiynau, cysylltwch:
Ebost: union.president@aber.ac.uk
Twitter: @bmeakin
Facebook: Urdd y Myfyrwyr Aberystwyth
Ben |
Blogiau
